Се лансира кампања која повикува на прекин на преговорите за името

Македонското меѓународно движење за човекови права (ММДЧП) започна кампања во повеќе градови со која повикуваат да се прекинат преговорите за името. На билборди во Скопје, Битола и Тетово стои прашањето „Кој ви даде право да преговарате за моето име и идентитет?“

Од движењето најавуваат дека кампањата ќе ја прошират и во други градови низ Македонија, а ќе ги испраќаат своите пораки и преку телевизиски и радио реклами, огласи во весници и на интернет, прес-конференции и стотици илјади летоци.

Од организацијата велат дека преговорите се расистички и андимакедонски.

„Специјалниот претставник на ООН, Метју Нимиц, тврди дека не се преговара за македонскиот идентитет, но преку Договорот со Бугарија, Законот за јазици, јавни изјави на македонски, американски и европски политичари гледаме дека се преговара токму за македонското ИМЕ и ИДЕНТИТЕТ, како директен резултат од преговорите за името. ММДЧП повторува дека сегашните граѓани и политичари на некоја земја немаат право да преговараат за вековен национален идентитет“, велат од таму.

Додаваат дека спорот за името е вештачки и дека негативно влијае не сите аспекти од животот во Македонија.

„Преговорите за нашето име се вистинската причина зошто Македонија не е во ЕУ и НАТО. Причината заради која Западот бара од нас да го смениме името е ТОКМУ ТОА ШТО Македонија преговара за името. Нашето име е Македонија. Нашиот идентитет е македонски. ВЕДНАШ ПРЕКИНЕТЕ ГИ ПРЕГОВОРИТЕ ЗА ИМЕТО“, посочуваат од движењето.

Македонското меѓународно движење за човекови права (ММДЧП) активно работи на полето на човекови и национални права на Македонците и другите обесправени народи од своето основање во 1986 година.