Претходниот претседател на ССМ, Живко Митревски преку буџетот на Сојузот си ги плаќал киријата за стан, трошоците за комуналии, чистачка, сметки, како и два шофери за двете службени возила, објави денеска новото раководство на Сојузот.
– Еден шофер го користел во Битола, еден во Скопје, тоа го нема ни премиерот на Владата – изјави Пеце Ристевски од СИЕР.
Митревски примал 50 илјади денари плата како претседател на Сојузот, 10.000 денари како член на Фондот за пензиско осигурување, 12 илјади за одвоен живот и како член на извршен одбор на ССМ си препишал на себе по 3.000 денари месечно.
– Посрамно не може да биде. Да можел денар екстра да го земе, ќе го земел – вели Ристевски.
Новото раководство на ССМ против Митревски најавува серија на кривични пријави, дел за фалсификување на документи, а дел за злоупотреба на службена положба. Како што велат од таму, тој сам одлучувал за сите трошоци како реновирање на простории во зградата на ССМ, што е спротвно на Законот. Во меѓувреме, Митревски формирал нова синдиклана организација наречена „Столб“, а со тоа, како што велат од ССМ, сакал да направи раздор кај синдикалците.
– Живко Митревски треба да престане да ја манипулира јавноста. Ние не сме подружница на никоја власт, ние сме синдикалци со чиста крв – изјави в.д. претседателот Дарко Димовски.
На прашањето, каде ќе биде распореден сега Митревски, Димовски одговори во Бирото за вработување како невработено лице.
М.В.